faah faahin dheeraad oo ka soo baxeysa dab xaley fiidkii ka dhacey suuqa x/wene iyo dabdamis lakeeney maalmo ka hor oo si weyn ugu qaybqaatey
Waxaa soo baxaya faafhaahin ku saabsan qasaaraha ka dhashay dab muddo saacado ah socday oo xalay maqribnimadii ka bilowday qeybo ka mid ah suuq weynaha degmada X/weyne ee gobolka Banaadir oo mudooyinkan ahaa mid si weyn u soo camirmayey.
Dabkaasi oo ilaa hadda aan la ogeyn sababaha dhaliyey ayaa xalay salaadii maqrib ka dib waxaa la arkay isagoo ka qarxay qeybta qudaarta iyo badarka lagu iibiyo ee Suuqa oo ku taala dhinaca galbeed ee kawaanka hilibka degmada X/weyne, isagoo dhulka la simay dhamaanba wixii hanti ahaa ee halkaas tiilay, waxaana dadka ku hanti belay ay u badnaayeen haween iibiya qudaarta oo aan hanti badan heysan.
Mar aan saaka soo marnay goobta uu dabkaas basbeeliyey ayaa waxaa ka muuqatay alaabo fara badan oo halkaas ku gubtay iyo qaac halkaas ka baxaya, waxay indhahaagu qabanayaan jiingado iyo alwaax isku dhex darsamay oo lagu dhisay goobihii ganacsi ee dabkaas uu baabiyey, waxaana sidoo halkaas lagu arkayaa qaar ka mid ah badeecadihii ku jiray goobahaas oo ku dhex milan raqda uu dabkaasi reebay,
Waxaa saaka goobtas iskugu tegay boqolaal dadweyne ah oo isku jira dad halkaas u soo daawasho tegay oo doonaya iney arkaan saameynta uu dabkaasi yeeshay iyo ganacsatadii laheyd goobaha xalay uu dabkaasi baab’iyey oo iyana fagaya meelaha gubtay hoostooda, iyagoo rajo ka qaba iney ka helaan wax uun uga badbaaday dabkaasi, inkastoo wax ka badbaadayba aysan jirin.
Booyado ay leeyihiin Ciidamada AMISOM iyo dab damis uu lahaa maamulka gobolka Banaadir oo maalmo ka hor la keenay magaalada ayaa ku guuleystay abaara 10:00 habeenimo iney bakhtiyaan dabkaasi, iyadoo amaanka suuqa ay sugayeen ciidamada milateriga iyo kuwa Booliska dowlada KMG Somalia io ilaa saaka lagu arkayey iyagoo tuban wadooyinka gala Suuqa isla markaana watay hub kala duwan.
Gudoomiyaha degmada X/weyne ee dowlada KMG Somalia C/llaahi Ibraahim Sahal Gardhuub ayaa cadeeyey in dabkaasi qasaare maaliyadeed oo aad u balaaran uu geystay, isagoo xusay in faafintaanka dabkaasi ay gacan ka geysteen dabeylo xoogan oo ka jiray magaalada maalmahan kuwasoo sii babiyey dabkaasi “Waxaan bilownay tirakoob ku saabsan qasaaraha maaliyaadeed ee dabkaas uu geystay, sidoo kale qashinka uu reebay ayaa u baahan in la qaado” ayuu yiri Mr Ghardhuub.
Waa markii ugu horeysay ee dab noocan uu ka kaco suuqa degmada weyne ee gobolka Banaadir muddo 20 sano ah, waxaana suuqaasi uu xirmay dabayaqaadii sanadkii 1991-dii markii magaalada ay ka bilowdeen dagaal mindhicireedkii u dhexeeyey beelaha ay ka soo kala jeedaan Marxuum. Jen. Caydiid iyo Cali Mahdi, hase ahaatee dabkan ayaa ku soo aaday xili suuqa asi uu si weyn u soo camirmay sanadihii ugu dambeeyey ka dib markii ay u soo guureen ganacsato badan oo Suuqa bakaaraha uga soo cararay amaan daro iyo dagaalo awgeed,
yucubka.net
Muqdisho Somalia
Popularity: 1% [?]